2Cor 3 | NdeIBE | STEP | Kanti sesiqala futhi ukuzethula na? Loba, njengabanye abantu, siswela izincwadi zokusikhulumela kini kumbe ezivela kini na?

2 Corinthians 3

1 Kanti sesiqala futhi ukuzethula na? Loba, njengabanye abantu, siswela izincwadi zokusikhulumela kini kumbe ezivela kini na?

2 Lina ngokwenu liyizincwadi zethu ezibhalwe ezinhliziyweni zethu, ezaziwayo lezifundwa ngumuntu wonke. 3 Liyabonakalisa ukuba liyincwadi evela kuKhristu, isithelo sokutshumayela kwethu, engabhalwanga ngeyinki kodwa ngoMoya kaNkulunkulu ophilayo, hatshi ezincezwini zamatshe kodwa ezincezweni zezinhliziyo zabantu.

4 Ithemba elinjengaleli ngelethu ngoKhristu phambi kukaNkulunkulu. 5 Kungayisikho ukuthi siyanelisa ukwahlulela konke esikwenzayo, kodwa amandla ethu avela kuNkulunkulu.

6 Usiphe amandla okuba yizisebenzi zesivumelwano esitsha – kungayisiso sokulotshiweyo kodwa esikaMoya; ngoba okulotshiweyo kuyabulala, kodwa uMoya uletha ukuphila.

Inkazimulo Yesivumelwano Esitsha

7 Uma imfundiso eyaletha ukufa eyayidwetshwe ngamabala elitsheni, yeza lenkazimulo, ukuze abako-Israyeli bangabukhangeli kokuphela ubuso bukaMosi ngenxa yenkazimulo yabo, lanxa nje yayisifiphala, 8 kambe imfundiso kaMoya kayiyikuba lenkazimulo enkulu na? 9 Uma imfundiso elahla abantu ilenkazimulo, pho inkulu kangakanani inkazimulo yemfundiso eletha ukulunga. 10 Ngoba okwakulenkazimulo khathesi akuselayo inkazimulo ekuqathanisweni lenkazimulo enkulu. 11 Njalo uma okwakufiphala kwaletha inkazimulo, pho inkulu kangakanani inkazimulo yalokho okungulaphakade!

12 Ngakho, njengoba silethemba elinje, silesibindi. 13 Thina kasinjengoMosi owamboza ubuso bakhe ukuze abako-Israyeli bangabukhangeli lapho inkazimulo yayisifiphala.

14 Kodwa izingqondo zabo zathundubezwa, ngoba kuze kube lamhla lesosembeso sisala sikhona lapho isivumelwano esidala sibalwa. Kasisuswanga, ngoba sisuswa ngoKhristu kuphela. 15 Langalolosuku nxa kubalwa umlayo kaMosi, isembeso simboza izinhliziyo zabo.

16 Kodwa uma umuntu ephendukela eNkosini, “isembeso siyasuswa.” 17 INkosi inguMoya, njalo lapho okuloMoya weNkosi khona, kulokukhululeka. 18 Njalo thina, sonke esibonakalisa inkazimulo yeNkosi ngobuso obungambozwanga, siguqulelwa ekufananeni layo ngenkazimulo ekhula kokuphela, evela eNkosini, enguMoya.